و حق الـ ألف و الـ لامين و الـ ها
روحي بهوى ساهي العين ولهى
لها ثغر و جبين و عين و الها
خد شبه البدر لو سطع ضيّه
لأجل عينك أصير رماد و انذَر
و لشوفتك ثور أذبح و أنذِر
إذا فد يوم أصير(ن) حَكَم و انذِر
أشيل أحمر طرد مو بيك , بيّه
يا حلو الطبع واصلني و قارب
ما عندي أهل غيرك و اقارب
سفينة بالبحر ردّتك و قارب
تشيل الحمل لو يثقل عليّه
تظل نجمة يا ضي العين بـ سماي
و يظل اسمك رفيق العمر بـ اسماي
ما يروي العطش بجفاك , بس ماي
العطش ترويه من تسأل عليّه
سر حبّك نِبَت بالشريان دوره
عزيز و الك بالشريان دورة
إذا شكّيت ؟ .. هاك القلب دوره
إذا غيرك لقيت بيه إعتب عليّه
عيونه سهام ترمي من يصدها ؟
و عليهـ الروح هامت من يصدها ؟
غزالة بقلبي تسرح , من يصدها
أقطعه اشلاء بـ اثنين ايديّه
بدمع عيني إكتبت لك خاطرة آني
و الك ما يوم كاسر خاطر آني
غير انت تجيني خاطر آني
إجي لك زحف لو صاير شلل بيّه
إذا دهرك يعيب إعليك عب له
و قلبي شقد تترسه هموم , عب له
إذا عنتر إنجن بـ عشق عبلة
هواكم حط جنون و طيش بيّه